Ritstjórn KRÓM skrifar Flokkað undir KRÓM TV, Matur & Vín.

KRÓM tv 5. þáttur – Æðislegar bananasnittur með súkkulaði ganache!

Í fimmta þætti af Matur & Vín sýnir Tinna Björg okkur hvernig á að baka himneskar bananasnittur með kaffinu. Fjölskylduskúffukakan kemst á eitthvað allt annað og æðra stig með tvenns konar kremi, bananakremi og súkkulaði ganache.

Baksturinn þarf ekki að vera flókinn, einföld skúffukaka með smá tvisti getur verið nóg til að heilla vini og vandamenn upp úr skónum um helgina. Svo er þessi dásemd líka tilvalin fyrir kökukaffið í vinnunni.

Bananasnittur

Súkkulaðiganache

250 ml rjómi
175 g suðusúkkulaði

Hitið rjóma að suðu og saxið suðusúkkulaði smátt. Athugið þó að rjóminn má ekki sjóða. Setjið súkkulaðið í skál og hellið heitum rjómanum yfir.Látið standa ósnert í 5 mínútur og hrærið svo súkkulaðinu og rjómanum saman þar til blandan verður að þunnu kremi.

Kælið í ísskáp þar til kremið verður seigfljótandi og nógu þykkt til að hægt sé að hella því yfir kökuna án þess að það leki niður með hliðunum. Þetta getur tekið nokkrar klukkustundir en mikilvægt er að fylgjast vel með kreminu svo það verði ekki of þykkt. Gáið að kreminu á 30 mínútna fresti.

Skúffukaka

4 1/2 dl hveiti
4 1/2 dl sykur
1 dl kakó
1 tsk salt
1 tsk matarsódi
1/2 tsk lyftiduft
1 1/2 dl vatn
1 dl grísk jógúrt
1 dl mjólk
2 egg
175 g brætt smjör
3 tsk vanilludropar

Blandið þurrefnum saman í skál.Hrærið vatni, grískri jógúrt og mjólk saman við þurrefnin.Bætið við eggjum, bræddu smjöri og að lokum vanilludropum.

Smyrjið ferkantað kökuform og hellið deiginu ofan í.

Bakið við 175° í 30-35 mínútur.

Kælið kökuna á meðan kremið er útbúið.

Athugið að ekki má opna ofninn fyrr en skúffukakan hefur bakast í um 30 mínútur eða þar til miðjan hefur bakast. Sé ofninn opnaður á meðan hún er hrá í miðjunni fellur kakan. Til að athuga hvort kakan sé bökuð í gegn, stingið prjóni í hana miðja. Ef prjónninn kemur hreinn upp úr kökunni er hún tilbúin.

Bananakrem

250 g mjúkt smjör
300 g flórsykur
2 tsk vanilludropar
2 bananar 

Þeytið smjör þannig að það verði alveg mjúkt og kekkjalaust. Bætið þá við flórsykri og vanilludropum. Maukið banana í blandara og þeytið vel saman við kremið á hæstu stillingu.

Smyrjið bananakremi á kökuna og hellið súkkulaðiganache yfir.

Skerið kökuna í snittur og raðið á fallegan disk.

Ef svo ólíklega vill til að eftir verði afgangur af kökunni er best að loka hliðum kökunnar með plastfilmu og geyma hana í kæli.

Fleiri uppskriftir er að finna á www.tinnabjorg.com

Endilega fylgist með mér á www.facebook.com/matarbloggtinnu

og

Instagram @tinnabjorgcom

Verði ykkur að góðu!

Hár og förðun : Steinunn Edda Steingrímsdóttir

Kveðja

KRÓM
Munið eftir að líka við okkur á facebook HÉR