Ritstjórn KRÓM skrifar Flokkað undir KRÓM TV, Matur & Vín.

KRÓM tv 6. þáttur – Dásamlegt humarpasta og hvítlauksbrauð!

Í sjötta þætti af Matur & Vín sýnir Tinna Björg okkur hvernig á að útbúa ótrúlega gott humarpasta og hvítlauksbrauð. Hérna getið þið séð hvað er auðvelt og fljótlegt að matreiða dýrindis mat… 

Humarpasta

450 g humarhalar

¼ bolli olía

3 fínsaxaðir hvítlauksgeirar

börkur af 1 sítrónu

1 tsk sjávarsalt

1 tsk svartur pipar

450 g pasta (fettuccine eða tagliatelle)

1 bolli hvítvín

safi úr 1 sítrónu

1 msk smjör

½ bolli rjómi

¼ bolli parmesanostur

¼ bolli steinselja

Blandið saman í skál olíu, hvítlauk, sítrónuberki, sjávarsalti og svörtum pipar. Klippið humarskeljarnar og opnið þær. Hreinsið humarinn og marinerið í olíublöndunni í 30 mínútur. Raðið humarhölunum í eldfast mót eða á ofnplötu þannig að kjötið snúi upp

Sjóðið pasta eftir leiðbeiningum með sjávarsalti og smá olíu. Þegar pastað er tilbúið, hellið vatninu af.

Steikið afganginn af marineringunni á pönnu. Gætið að því að ekkert skelbrot af humrinum leynist í marineringunni. Hellið hvítvíni á pönnuna og látið krauma í um 5 mínútur þannig að vínið minnki um helming. Bætið smjöri, rjóma, sítrónusafa og parmesanosti við sósuna. Setjið pasta og saxaða steinselju á pönnuna og veltið upp úr sósunni. Að lokum er sjávarsalti og svörtum pipar sáldrað yfir pastað og hrært aðeins saman við.

Ástæðan fyrir því að ég set sjávarsaltið og svarta piparinn síðast er sú að mér finnst svo ofboðslega gott að bíta í eina og eina stökka saltflögu og sterkt piparkorn með hverjum bita. Það gerir pastað svolítið ferskara.

Hitið ofninn í 200° á grillstillingu og grillið humarhalana í 3-6 mínútur.

Í blálokin er pastanu skammtað jafnt á diska og humarhalarnir lagðir fallega ofan á.

Með humri ber ég alltaf fram einfalt heimagert hvítlauksbrauð. Það er svo miklu betra en þetta sem maður kaupir frosið, þið verðið sko ekki svikin.

Hvítlauksbrauð

1 snittubrauð

150 g mjúkt smjör

2-4 hvítlauksrif

handfylli söxuð steinselja

Saxið hvítlauksrif og hrærið saman við smjör ásamt steinselju.Skerið snittubrauð í þunnar sneiðar og smyrjið með hvítlaukssmjörinu.Ristið hvítlauksbrauðið á grind í ofni við 200° í nokkrar mínútur eða þar til það verður fallega brúnt og stökkt að utan en ennþá mjúkt að innan.

Ef smjörið er kalt og hart þá er gott að rífa það með rifjárni, þannig er það fljótara að mýkjast og auðvelt að hræra hvítlauknum og steinseljunni saman við.

Ég set smjörið líka stundum á afþíðingu í örbylgjuofni í nokkrar sekúndur til að mýkja það.

Með svona humarpasta þykir mér ómissandi að leyfa sér eins og eitt hvítvínsglas. Það vín sem mér finnst henta einkar vel með þessum rétti heitir Adobe og kemur frá Chile. Chardonnay þrúgan sem vínið er unnið úr er lífrænt ræktuð en Bodegas Emiliana, vínhúsið sem framleiðir hvítvínið, er einn stærsti framleiðandi lífrænna vína í heimi.

Það er ekki verra að geta skálað í lífrænu, það get ég sko sagt ykkur.

Þessa ofurrómantísku diska undir humarpastað fékk ég í Litlu Garðbúðinni en fatnaðurinn er úr Lolita.is

Hár og förðun: Steinunn Edda Steingrímsdóttir & Áslaug Brynja Ingþórsdóttir

Fleiri uppskriftir er að finna á www.tinnabjorg.com.

Endilega fylgist með mér á www.facebook.com/matarbloggtinnu

Verði ykkur að góðu kæru vinir og innilegar þakkir fyrir að fylgjast með!

Kveðja

KRÓM
Munið eftir að líka við okkur á facebook HÉR